Servicio di Aduana ta notifica tur importador di vuurwerk riba e procedimento di declaracion y e entregamento (vrijmaking) di containers di vuurwerk pa e aña aki

ORANJESTAD – En coneccion cu importacion di vuurwerk (klapchi), Servicio di Aduana ta notifica tur importador di vuurwerk riba e procedimento di declaracion y e entregamento (vrijmaking) di containers di vuurwerk pa e aña aki. 

Tur importador di vuurwerk tin cu entrega e declaracion y tur e documentonan correspondiente cu ta regarda e cargacion di vuurwerk cu ta e.o, e permiso di importacion, facturanan, bill of lading etc. na tempo na oficina principal di Servicio di Aduana. E facturanan mester duna un descripcion specifico di e sorto, cantidad y balor di e vuurwerk.

Despues cu e declaracion ta completamente procesa den e sistema automatisa, e importador lo tin cu paga e derecho di importacion na caha.

Servicio di Aduana ta haci un suplica na tur importador di vuurwerk pa entrega e declaracion tempran pa ora e containers di vuurwerk yega den Waf di Oranjestad, ya douane tin e declaracion completamente procesa y tambe pa’sina douane por planifica eficientemente e fechanan riba cual e Team special di vuurwek lo sali controla. Alaves nos kier recorda tur cliente cu pa procesa e declaracion lo dura mas o menos dos pa tres dia.

GERENCIA DI SERVICIO DI ADUANA
3 december 2008