Servicio di Aduana kier haci un clarificacion encuanto e categorisacion di paña cu ta traha di brei- of haakwerk

ORANJESTAD – A base di e comunicado aki Servicio di Aduana kier haci un clarificacion encuanto e categorisacion  di paña cu ta traha di brei- of haakwerk.
Den pasado e codigo di mercancia segun sistema bieuw riba paña pa bisti gebrei of gehaak tabata 60.01-B.
Na mesun momento paña traha tehi (geweven) tabata wordo categorisa bou di e codigo di mercancia 61.01. Anteriormente e clientenan di duane tabata yena riba e declaracion di duane, esta e “Enig Document” paña traha di katuna of nan tabata yena paña pa bisti en general (kledingstukken). Y nan tabata usa e codigo di mercancia 61.01 como si fuera cu tur paña ta tehi. Esaki no a ocasiona ningun clase di problema, pa motibo cu e tarifa di e derecho di importacion riba ambos tabata 7.5%.

Cambio di tarifa na aña 2006:
Cambio di tarifa a drenta na vigor riba cierto productonan cu ta, e.o paña traha di tela of paña traha di brei- of haakwerk na juni aña 2006. E tarifa di ambos producto ariba menciona a subi te na un tarifa di 12%. Esaki tampoco no a trece confusion entre e clientenan ora di yena e declaracion, pasobra tur dos di e productonan ariba menciona tabata tin un tarifa di 12%.

Cambio di tarifa na aña 2007:
Pero entrante januari 2007 decision a wordo tuma dor di Gobierno pa reduci tur tarifa di paña te na 6% cu exepcion di paña gebrei of gehaak cu a keda cu un tarifa di 12%.
Servicio di Aduana kier pone na conocimiento di cada cliente cu ora di importa paña pa bisti gebrei of gehaak, nan tene cuenta cu e tarifa ta 12% na derecho di importacion.

GERENCIA DI SERVICIO DI ADUANA
30 JUNI 2008